نارسیسیزم

اطرافلارین‌داکی اینسانلارین دویغو، احساس و عاطیفه‌لرینی اَمیب بونونلا بس‌لنیرلر. بو اؤزلرینه سئودالی اینسانلار، دائم باشقالاریندان تعریف، آلقیش گؤزله‌‍‌ییر، لاکین اؤزلری هئچ بیر شئی وئرمه‌یه یاناشمازلار.

آینانین قارشی‌سیندا اوزون ساعاتلار کئچیره بیلن نارسیسیت آداملار، اؤزلرینی حددیندن آرتیق بیه‌نر. اوشاقلار اؤزلرینی تانیماق اوچون اوزون-اوزون آینایا باخا بیلدیکلری اوچون اونلار اوچون نورمال بیر داورانیش اولسادا بو، بؤیوکلر اوچون آنورمال بیر خصوصیت کیمی ده‌یرلندیریلیر. یئنی‌یئتمه‌لر ده یئتکین‌لیک و نوجوانلیق باشلایان مدت‌ده بده‌نلرین‌ده‌کی دییشیک‌لیکلری ایزله‌مک و یا جوشلارینی کنترل ائتمک اوچون اوزون مدت آینانین قارشیسیندا قالا بیلیرلر. اما ۲۵-۳۰-۴۰ یاشینداکی بیر آدامین آینانین قارشیسیندا ساعاتلارلا واخت ایتیرمه‌سینی هئچ ده نورمال بیر داورانیش کیمی قارشیلاماق اولماز.

نارسیسیزم ساده‌جه وورغونلوق‌دان عبارت اولان شخصیت پوزونتوسو کیمی تعریف اولمور. نارسیسیستلر و یا همن اؤزونه سئودالی اولان اینسانلار، باشقا اینسانلاری ایستیثمار ائتمه موضوعوندا دا قاباقجیلدیرلار. اؤز منفعتلری اوچون هرکسی چئینه‌ییب کئچه بیلرلر. هر شراییط‌‌ده اؤنملی اولان اؤزلری‌دیر. اونلارین گؤزونده باشقا اینسانلارین هئچ بیر اؤنَمی یوخدور، اؤز منفعتلرینین دالیسیجا گئدیر و بو ایشی گؤرمکدن ایینه اوجو قدر ده اوزونتو و پئشمانلیق حیس ائتمزلر.

نه ایسه، گونوموزده گئتدیکجه ده نارسیسیست اینسانلار چوخالماقدادیر. چونکی بو جور اینسان‌لیق کئیفیتینه صاحب اولماق اینسانا باشقالارینا نظره‌ن بیر آز داها اؤنچیخما فورصتی وئریر. اؤزونه وورغون، اؤزونو یئره-گؤیه سیغ‌دیرمایان، « کیچیک داغلاری من یاراتدیم» دئیه‌ن اینسانلار جمعیت‌ده داها چوخ دیر گؤرورلر.

نارسیسیستیک شخصلرین معین یؤنلریندن بیری ده چوخ آشیری حیس اولان خصوصیت لری پاخیل‌لیق دویغوسودور. پاخیل‌لیق و حسودلوق قیسقانج‌لیق‌دان بیر آز داها فرق‌لی چوخ منفی بیر دویغودور. پاخیل‌لیق دویغوسونو داشییان اینسان باشقالارینین خوشبختلیینه، اوغورونا موطلق دؤزومو یوخدور.

 

نارسیسیست اینسانلار ایش حیاتیندادا اوزه چیخا بیلیرلر. ایشلرینی حقیقته‌ن چوخ سئودیکلری اوچون دئییل، اؤزلرینی باشقالارینا بَیه‌ن‌دیرمک اوچون داها چوخ ایشله‌یه بیلرلر. بیر نارسیستین ان گوجلو ایستیفاده ائتدیی سلاح کلمه‌لری‌دیر. کلمه‌لری ایله اینسانلاری یئرین دیبینه باتیریرلار.

اؤزونو سئومکله نارسیسیزم آراسینداکی فرق اورتایا قویولمالی‌دیر. هامیمیز اؤزوموزو سئویریک بونا احتیاجیمیز دا وار. چونکی اؤزونو سئومه‌یه‌ن، ائتدیی یاخشی شئیلره قیمت وئرمه‌یه‌ن بیر اینسان سونوندا گله‌جه‌یه دویدوغو اومودو ایتیرر.

اینسانلارین نارسیسیزمه مئیل ائتمه‌سینین باشقا اساس ندنی، گونوموزده جمعیتین بیربیریله ناسالیم رقابتینی داها اؤن پلانا چیخاران قورولوش و ساختار دا تأثیرلی‌دیر. جامیعه نین بو غلط قورولوش‌ و ساختاریندا وورغولانان دوشونجه بودور: «هر موضوعدا یاخشی اولماق مجبوریتینده‌سیز یوخسا باشقلاری گلیب سیزین یئرینیزی اَلینیزدن آلار». بئله بیر دوشونجه طرزی ایسه هر موضوعدا ائقویست‌لیک و خودخواخلیغادا شانس قازاندیریر.

رادیو کایزن

ممکن است به این موارد نیز علاقه مند باشید:

0 دیدگاه در “نارسیسیزم”

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ما را دنبال کنید

ویدئو برتر

مجوز فعالیت سایت

logo-samandehi

DESIGN BR: RAFIG KHIYAVI