غیبت

رادیو کایزنین سئوگیلی ایزله ییجیلری، ۴۳-جو برنامه ده غیبت له شن و غیبت ائلیه ن آداملارین باره سینده دانیشیغیمیز اولاجاق، بیزیمله یول بیر اولون.

اینسان دوغولدوغو آن، روحی خاصیتی، آغلی و استعدادی دا اونونلا برابر دوغولور. اوندان سونرا اینسانین نجور بیر بشر اولماسیندا دوشدویو موحیط، یاشادیغی یئر و شراییطی ده نظرده آلا بیله ریک. نئجه کی بعضا، پیس بیر موحیط یاخجی بیر ژنتیکی خاراب دا ائلیه بیلر، هارداسا یاخجی بیر موحیط ضعیف بیر ژنتیکی ده یوخاری بیر درجه ده گلیشدیره بیلر ده. دونیایا گلن اینسانین دونیایا باخیشی موختلیف اولدوغو کیمی، هر بیر اینسانا اولان باخیشی دا موختلیف اولا بیلر. عقلینه و عملینه گؤره، مولانا جمال الدین رومی، امام الدین نسیمی، ابن سینا و اونلار کیمی دانشمندلر، اینسانلارا قیمت وئررکن اونلاری کامیل اینسان کیمی، شرطی قیمتلندیرمه اصولوندان استفاده ائده رک ایکی گروها بؤلموشلر: جاهیل اینسان و کامیل اینسان.

کامیل اینسان آغلینین گوجونه اینانان، علمی، باشاریغی، خیرخواهلیغی، یاشادیغی جمعیته خئییر وئره‌ن و اونون خوشبخت‌لییی اوغروندا جانینی فدا ائتمه‌یه حاضر اولان و لاپ آزی باشاردیغینی و الیندن گَلنی ائلیه‌ن و ائله‌مک ایسته‌یه‌نلردیر. و اینسانین کامیل‌لیک درجه‌سینی قیمتلَن‌دیرمک اوچون بو لیستی ایسته‌دییمیز قدر اوزادادا بیله‌ریک. جاهیل اینسان عکسینه اولاراق، بوتون پیس‌لیکلره حاضیر اولان، و اونلاری ائلیه‌ن، یالتاق، غیبتجیل، ایکی اوزلو و ها بئله یالان‌چی دا اولا بیلیر…

 

آیریسینین یاخشی عملینه مانع ده اولا بیلر، اونا حسودلوق ده آپارا بیلر… بو مقام‌دا اینسانین ژنتیکینی نظره آلماساق دوشدویو موحیطین ده رولو اؤز ایشینی گؤرموش اولور… تاسسوفله یالتاق‌لیق و غئیبت ساری سارماشیق و قورخولو بیر عیللت کیمی جمعیتی ساریماق‌دادیر. طبیعی کی، بو ایکی سیندیرومو ان چوخ یارادان عامیل اطراف موحیط و شراییط‌ اولمالیدیر…

ان چوخ باشاریق‌سیز،علمی و اجتماعی موحیط ‌ده دوشونجه‌سی پیشرفت‌دن دالی قالان اینسانلارین بیر قیسمی بو مریضچیلیی توتورلار… و لاپ پیس جهتی ده بودور کی، بو جور اینسانلار ائتدیکری پیس‌لیکلرین درجه‌سینی قیمتله‌ن‌دیرمک حیسسلرینی ایتیردیکلری اوچون یا اؤزلرینه طرف موقابیل آختاریر،هم دوشونجه و همفیکیرلرینین چوخ‌لوغونو آرزو ائدیرلر. یا دا تأثیر دایره‌لرینی گئنیشله‌ندیرمک اوچون غیر سنتی مئتودلاردان ایستیفاده ائد‌رک اطراف‌دا اولان کامیل اینسانلارا ضرر وئرمک‌دن چکینمیرلر. نه ایسه بو بیر خاصیت کیمی یوخ، قورخونج بیر مریضچیلیک کیمی ده یرلندیریلیر.

حال حاضیردا بئله بیر تشخیص اولماسا دا اینانیرام کی، یاخین زامانلاردا بو مریچیلییین معالیجه‌سینه اولان چوخلو درخواست‌لاری نظره آلاراق روانشناسی علمی بلکه ده بونو روانشناختی مریضچیلییین لاپ قورخونج نوعو کیمی تصدیق ائد‌جک‌دیر. لاپ پیسی ده بودور کی، بلکه ده، میللت اولاراق آمارلاردا لاپ چوخ تشخیص قویولان کیمی، بیرینجی‌ جامعه لرین ایچینده یئر آلدیق. عیللتینی بررسی ائله‌دیکده تمه‌لی موکممللیت‌چی‌لیک‌دن، تاماملانمامیش اظطراب‌لاردان، اؤزگووه‌ن‌سیزلیک‌ و اعتماد به نفسین ضعیفلییییندن، اولانلا یئتینمه‌مک‌ و آرتیق تاماحلیقدان، اومودسوزلوک‌(یعنی اوزو حاقین‌دا دوشونمه‌ییب ده باشقالارینین حیاتینی گؤتور-قوی ائتمکدن) شرایطین آزلیغین‌دان اؤزونو داها باشاریق‌لی و هر شئیی چوخ بیلمیش کیمی گؤسترمک ایسته‌یی و غیره.

سیندروم اؤزونو قادینلاردا و کیشیلرده فرق‌لی فورمدا گؤستریر. قادینلاردا داها چوخ گؤروله‌ن بو تشخیص سؤز آلماق اوچون، کیمی سه کیمین‌سه گؤزوندن سالماق اوچون، کیمین‌سه سیررینی هر کسه آچماق اوچون و بیر چوخ دیگر هدفلر داشیییرسا کیشیلرده اؤزونو تصدیقله‌مه یانینداکی اینسانا اونون داها اوستون و اوندان باش اولدوغونو گؤسترمه، هر اولانی چوخ یاخشی آنلادیغینی بیلدیرمک اوچون و یا هئچ کیمی بَیَنمیرمیش کیمی دوشونجه‌سی اولدوغونو گؤسترمک و یالتاق‌لیق اوچون ایستیفاده ائدیلیر.

اصلین‌ده اینسان اوچون هئچ بیر خئیری اولمایان عکسینه اینسانی اطرافین‌داکی اینسانلارین گؤزون‌دن سالان، گوونیلمه‌یه‌جک و حؤرمت اولونمایاجاق، بیر حالا سالان بو عادت اونو ائد‌نلر اوچون ساده‌جه گونلوک رئژیمین اساس حیسه‌سی و قطعا تاخیره سالینمایاجاق بیر مشغولیت‌دیر. بو سیندرومون کئچیجی‌ و انتقال تاپا بیلمه‌سینی ده دئمک ایستردیم. ژنتیک یوللا آتادان اوغولا و بوتون ژنی احاطه ائد‌ن اینسانلارا کئچه بیلر. مریضچیلیک اؤزو ایله یالانا تمایل، سایریشان نئوروز، اجتماعی فوبیا و توهم دا یارادیر. بئله اینسانلار بو عادت اوزره اؤزلرینی حرفه‌ای سایدیقلاری اوچون ائوده اوتوردوقلاری حال‌دا غیبت ائتدیکلری اینسانین حاققیندا اؤنجه‌دن فانتزی قورورلار. اویدوردوقلاری یالانلارا اؤزلری ایناندیقلاری و زامان کئچدیکجه بونو بیر حقیقت کیمی قبول ائتدیکلری اوچون «عقلینین» و فانتزی‌سی‌نین «محصولو» اولان یالانی اطرافا یایماغا باشلاییرلار.

 

درمان اصولونون نئجه آپاریلدیغی حاققیندا دوشونسک اونلاری ایلک اؤنجه روانکاوی ائدیب حیاتلارینداکی موشکوللری حل ائتدیک‌دن سونرا روان‌پزشکی درمان طریقیله آرادان قالدیرماق موموکون‌دور. حیاتلارین‌دا اولان موشکولو تاپمانین ان آسان یولو ایسه دانیشدیغی اینسان‌دا داها چوخ ندن دانیشیرسا، دئمه‌لی بو اینسانین اؤز حیاتیندا او یؤنده درین یوخسوللوق وار دئمک‌دیر. بو جور آداملار دانیشدیقلارینین اؤز حیاتلارین‌دا دا اولماسینی آرزو ائتمه‌لری کیمین‌سه حاققیندا یالنیز فیکیرلرینی پیس یؤن‌ده ایفاده ائتمکله تاماملاییرلار. دوشونجه‌میزه گؤره اگر گونوموزده بو جور آداملارلا راستلاشیریقسا فیکیر وئرمه‌یه‌نلرده وار. لاکین بیلمه‌لیییک کی، اونلار هئچ یورولمادان دانیشدیقلارینین تایید اولماسینی ایسته‌یه‌جکلر. بو ایشی گؤردویوز زامان ایسه، موشکولو داها دا درینلش‌دیرمه‌یه یاردیم ائتمیش اولورسوز.

بو مریضچیلییه یولوخموش اینسانلاری تانیماق او قدر ده چتین دئییل‌دیر. اونلار جمعیت ایچین‌ده داها چوخ دیققتی یایینیق و پخش اولان بیری کیمی گؤرونورلر. چونکی دایما اطرافداکی اینسانلاری آنالیز ائتدیکلرینه و تاپدیقلاری موضوعو دانیشماغا، گئنیشلَن‌دیره‌رک یایماغا واسطه آختاردیقلارینا گؤره همیشه بئیینلری مشغول وضعیت‌ده اولور …

رادیو کایزن

ممکن است به این موارد نیز علاقه مند باشید:

0 دیدگاه در “غیبت”

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ما را دنبال کنید

ویدئو برتر

مجوز فعالیت سایت

logo-samandehi

DESIGN BR: RAFIG KHIYAVI